Veikindi

Það var hringt í mig frá skólanum um hádegi á föstudaginn og Inga María var þá komin með hita.  Ég sótti Ingu Maríu og fór með hana heim til mömmu sem ætlaði að passa hana þar til að pabbi kæmi snemma heim úr vinnu, þau voru á leið út með vinahópnum.  Þegar ég ætlaði út úr dyrunum hringdi pabbi og var að leggja af stað heim!  Ég skaust þá í vinnuna og sótti tölvuna og setti smá verkefni fyrir nýja fjármálaráðgjafiann sem ég hafði verið að kenna nýja starfið.  Greiið konan þurfti bara að bjarga sér sjálf eftir hádegi fyrsta daginn!

Ég gaf svo Ingu Maríu verkjalyf en hún kvartaði samt áfram í höfðinu svo við fórum á læknavaktina að kíkja á hana.  Læknirinn fann ekkert annað að henni en flensu svo við fórum heim með þau fyrirmæli að tvöfalda verkjalyfin.  Daginn eftir vaknaði hún svo með tæplega 40 stiga hita og svo minnkaði hitinn mikið og rauk svo aftur upp í yfir 40 stig um kvöldið! 

Hún hefur svo verið mikið hressari í dag og ekkert fengið neitt verkjalyf og var með 7 kommur áðan þegar ég mældi hana um 3 leitið.  Sjáum til hversu háan hita hún verður með í kvöld, vonandi er þetta að ganga yfir svo hún komist í búðir að syngja á miðvikudaginn!  Hún hefur sko mjög oft verið veik á öskudag allavegana síðustu tvo öskudaga og jafnvel fleiri!

Annars er ég bara að vinna og vinna mætti í vinnuna bæði laugardag og sunnudag.  Nýji fjármálaráðgjafinn byrjaði síðasta föstudag en auðvitað á ég eftir að kenna henni starfið en munar miklu að hún sé allavegana byrjuð.