Ég byrjaði í sumarfríi á mánudag og er búin að liggja í leti síðan. Virkilega notalegt að vera í fríi en ég þarf kannski að fara að gera eitthvað annað en liggja og lesa eða eitthvað álíka gáfulegt! En það er bara svo notalegt. Matti byrjar svo í fríi um næstu helgi.
EItt af því sem ég ætlaði að gera í fríinu var að fara í klippingu með allt liðið. Áróra fékk fyrsta tíman í gær, stelpurnar eiga tíma í dag og ég svo á morgun. Verðum allar hrikalega sætar um helgina :-) Áróra lét breyta lúkkinu sínu svona í tilefni þess að hún er orðin menntskælingur. Hún ætlaði að fá sér topp líka en hárgreiðslukonan mælti ekki með því nema hún nennti að slétta toppinn á hverjum morgni. Sé ekki alveg Áróru í því hlutverki á morgnanna svo hún sleppti því að setja topp. En hún lét setja styttur í hárið og hér kemur mynd af henni með nýju klippinguna! Reyndar sléttaði konan líka á henni hárið þar sem hún sagði betra að klippa styttur í slétt hár því þá sér maður betur hvernig þær liggja eða eitthvað slíkt.
Þetta var skásta myndin sem ég fann á flickr síðunni minni af Áróru ég þarf greinilega að taka fleiri myndir af henni !
Á þriðjudaginn síðasta varð frumburðurinn minn 16 ára, ótrúlegt alveg hvað tíminn flýgur! Við fórum út að borða og Áróra vildi susí svo við fórum á fiskmarkaðinn þar sem að sá staður bíður upp á súsí og margt annað ætilegt fyrir okkur hin sem viljum ekki súsí. Vorum öll mjög ánægð með þennan stað.
Síðan á miðvikudag útskrifaðist stúlkan úr grunnskóla. Það var voðalega fín útskriftarathöfn með atriðum frá nemendum. Dans, söngur og fiðluleikur mjög flott allt saman.
Áróra fékk verðlaun fyrir að vera hæðst í sínum skóla í samræmduprófinu í ensku. :-)
Í dag er svo afmælisveislan hennar eftir þrjá tíma fyllist hér allt af ættingjum. Við Áróra þrifum húsið í gær svo nú erum við að vinna í að klára veitingarnar (þ.e. þegar ég er ekki í tölvunni!!)
Jæja hér er ég búin að setja saman mynd af sýningunni hennar Ingu Maríu frá því í gær.
Síðan skellti ég inn mynd af foreldraboltanum sem ég tók í dag. Matti og Kolla voru að spila (í sitt hvoru liðinu auðvitað) en Ingu Maríu lið horfði á.
Hér er svo önnur mynd þar sem Katja er í færi og Matti og Kolla eru að hlaupa á eftir.
Það var nóg um að vera á þessu heimili í gær. Það voru stigapróf í balettnum hjá Kollu, sýning í fimleikunum hjá Ingu Maríu og síðan gisting í ÍR heimilinu með fótboltanum.
Dagurinn sem sagt byrjaði af fullum krafti klukkan 10 þegar við þurftum að hafa okkur til fyrir daginn og allir að vera komnir út svona 20 mín í 11.
Matti fór með Kollu í stigaprófið. Hún er að taka próf til að mega fara upp í 1.stig í balettnum. Hún hefur síðustu þrjú ár verið í því sem kallast forskóli en er nú komin upp í að þurfa að taka próf á milli ára til að meta hvort hún haldi áfram eða þurfi að æfa sig betur á því stigi sem hún er í. Við höfum aldrei áður farið í svona en þær gerðu víst allar æfingar saman að fyrirmælum kennarans síns en skólastjórin horfði á og var eflaust að meta þær. Spurning hvort að þær fái einkun eða bara staðist/fallið! Kemur í ljós.
Ég og Inga María fórum í smáralind á sama tíma og Kolla og Matti fóru í balettinn. Okkur vantaði að kaupa andlitsmálningu til að teikna blóm framan í Ingu Maríu fyrir sýninguna. Það er búið að loka dótabúðinni í smáralindinni og við fundum ekki andlitsliti í Hagkaup og starfsfólkið vissi ekki um það ef það væri til. Ég nennti nú ekki að fara út úr smáralind að finna aðra búð svo við keyptum gulan augnskugga í Apótekinu til að redda okkur. Við fórum svo inn á klósett í smáralindinni og ég notaði svartan eyeliner til að teikna útlínurnar, bláan eyeliner og gula augnskuggan til að fylla upp í blöðin á blóminu. Aðalgallinn var að guli liturinn var voða fljótur að mást af miðað við hitt sem er ennþá á henni rúmum sólahring seinna!
Við Inga María drifum okkur svo upp í Gerplu þar sem Inga María átti að vera tilbúin í fötum klukkan 12. Við fórum inn í búningsherbergi og Inga María skipti um föt og hljóp glöð og kát að leika við fimleika vinkonur sínar. Ég fór þá fram til að komast sem fyrst inn í salin þar sem það eru ekki merkt sæti á þessum sýningum og við vildum fá góð sæti. Matti og Kolla komu á sama tíma og ég var búin að þessu þannig að við fórum saman inn og dreifðum okkur um heilan bekk svo að ömmur og afar kæmust líka fyrir.
Sýningin var mjög flott og Inga María stóð sig vel. Ég tók vídeó sem ég er ekki búin að setja inn í tölvuna en skal setja það á youtube ef það er ekki of dökkt.
Eftir sýninguna slökuðum við á heima í svona tvo tíma en svo þurftum við að undirbúa gistingu í ÍR heimilinu. Við Matti fundum til svefnpoka og dýnur út í bílskúr og svo fórum við stelpurnar og versluðum nammi og morgunmat.
Við vorum mættar í ÍR heimilið klukkan 6. Þar var byrjað á að koma sér fyrir, blása upp dýnur og gera svefnpokana tilbúna og slíkt. Stelpurnar voru allar mjög spenntar yfir þessu og óróinn í salnum í takt við það! Við pöntuðum pitsur um hálf 7 en var klukkutímabið sem var svo sem allt í lagi.
Ein af mömmunum (vorum fjórar sem gistum með þeim) fór með stelpurnar í spurningakeppni. 6. flokkur á móti 7. flokk og síðan í agúrkustút (hey við áttum enga flösku!).
Síðan voru pitsurnar borðaðar með bestu lyst og eftir matin fóru tvær mömmur með þá sem það vildu í kvöldgöngu en ég og ein önnur vorum eftir með þeim sem ekki vildu fara í göngu.
Við spiluðum og sumar fóru út á fótboltavöll að leika sér. Klukkan níu byrjaði svo mynd í sjónvarpinu sem þær fengu að horfa á í staðin fyrir spóluna því við fengum dvd tækið ekki til að virka.
Stelpurnar komu svo voðalega kátar úr kvöldgöngunni þær höfðu m.a. séð kanínur niðri í Elliðarárdal og þær voru það gæfar að Linda (bekkjarsystir og góð vinkona Ingu Maríu) gat haldið á einni og hinar stelpurnar klappað kanínunni.
Stelpurnar léku sér svo mjög vel saman allt kvöldið, sumar horfðu á myndina, sumar spiluðu, sumar léku fótbolta út á velli og sumar ærsluðust um. En mér fannst áberandi að ég gat aldrei séð að neinn væri útundan heldur voru alltaf nokkrar saman að leika sér við eitthvað.
Rétt rúmlega 10 byrjuðum við að láta stelpurnar gera sig tilbúnar fyrir rúmið. Bíómyndin var samt ekki búin fyrr en um korter í 11 og í endin held ég að næstum allar stelpurnar hafi verið farnar að horfa á myndina þegar þær uppgötvuðu að það var afsökun fyrir að vera ekki rekin ofan í svefnpoka.
Rúmlega 11 voru samt allar komnar ofan í svefnpoka og ein mamman las tvær sögur, hún las alveg rúman hálftíma. Lesturinn hjálpaði mikið til að róa stelpurnar en sumar áttu samt erfitt með að sofna þrátt fyrir langan lestur.
Okkur mömmunum fannst samt áberandi að eldri stelpurnar voru samt verri með það en efluast eru þær bara vanari að vaka lengur, þessar yngri voru orðnar alveg útkeyrðar svona seint. EIn stelpan (stór ekki ein af litlu) fékk mikla heimþrá og eftir nokkuð langan grátur fór hún heim frekar en að gista.
Ég get nú ekki sagt að ég hafi sofið mikið um nóttina. Okkar dýnur voru nálægt stórum glugga sem er ekki með neinum gluggatjöldum og hinir gluggarnir eru bara með þunnum gluggatjöldum svo það var alveg bjart hjá okkur alla nóttina. Síðan lak dýnan mín svo um tvö leitið þá gafst ég upp og skreið upp á dýnuna til Kollu. Ég dottaði í 1-2 tíma í einu en svaf nú ekki í lengri dúrum en það með birtuna og 27 stelpum + fjórum mömmum að hreyfa sig.
Stelpurnar fóru flestar á fætur um 8 sem ég held að sé bara nokkuð vel sloppið. Þær léku sér, fengu sér morgunmatinn sinn og léku sér svo meira Um hálf 10 létum við þær fara að pakka saman dótinu sínu. Þær þurftu nú tölverða hjálp enda áttum við svo sem ekki von á öðru en þar sem þetta átti hvort sem var að vera æfing fyrir keppnisferðina í sumar þá fannst okkur ágætt að þær æfðu sig í að pakka saman hlutunum sínum, tæma dýnurnar og pakka saman svefnpokum. Ég hef nú samt ekki tölu á hve mörgum svefnpokum ég tróð í poka! Eftir þetta fóru stelpurnar á æfingu og við þrifum. Held að félagsheimilið hafi verið töluvert hreinna þegar við fórum en þegar við komum :-)
Klukkan hálf 11 byrjaði æfing með foreldrum en ég held ég hafi sjálf nú ekki verið komin út fyrr en um 11 eftir þrifin. Matti og fullt af pöbbum og nokkrar mömmur spiluðu við stelpurnar á tveimur völlum. Þegar líða tók á var nú nokkrum mömmu ýtt út á völlin eftir því sem pabbarnir urðu þreyttari og vildu skipta út foreldrum. Stelpunum var skipt í þrjú lið og hvert lið spilaði tvisvar við sitt hvort foreldra liðið og hvíldi svo einn leik. Ég held ég hafi aldrei séð fullorðna karlmenn klúðra jafnmikið af dauðafærum :-) Svo var mjög kómískt að sjá liðið stoppa að spila meðan andstæðingarnir (foreldrarnir) reymuðu skóna fyrir andstæðinga sýna! Í lokun var svo foreldrunum skipt í tvö lið og spiluðu á móti hvort öðru með doldið meiri hörku en hafði veri fram að því og fólk hætti alveg að klúðra dauðafærunum! Eftir að búið var að spila í dáldin tíma var jafnt og ákveðið að næsta mark yrði þá sigurmark og því miður voru það andstæðingar Matta sem skorðu næsta mark en hann stóð sig samt vel.
Púff þetta var löng færsla enda búin að vera löng helgi hrikalega notalegt að vera lögst í sófan með ferðatölvuna. Mikið væri gott að eiga auka dag en ekki að eiga að mæta í vinnu á morgun! En jæja maður verður víst að mæta í vinnu enda stendur til að taka til í geymslunni! Jibbí get ekki beðið!!
Jæja Áróra er komin með einkunnir úr samræmduprófunum og hún stóð sig bara vel.
Einkunnirnar eru:
Íslenska 8,5 raðeinkun 92
Enska 9,0 raðeinkun 99
Danska 8,5 raðeinkun 96
Náttúrufræði 7,0 raðeinkun 86
Stærðfræði 7,0 raðeinkun 63
Meðaleinkunin hennar er því 8 sem hún vonar að sé það sem til þarf til að komast inn á fornmálabraut MR.
Inga María tók þátt í sinni fyrstu fimleikakeppni á föstudaginn var. Þetta var innanfélagsmót hjá Gerplu fyrir krakka sem aldrei hafa tekið þátt í móti áður.
Fyrirkomulagið var þannig að keppendur fengu gefna 1-3 broskarla fyrir hverja æfingu eftir því hve vel til tókst. Í lokin fengu svo allir verðlaun en hver og einn fékk verðlaun fyrir þá æfingu sem hann stóð sig best í. Inga María fékk verðlaun fyrir gólfæfinguna.
Eftir keppnina kom konan sem var kynnirinn (við vitum ekki hvaða titil hún ber hjá Gerplu) og sagði okkur að Inga María mætti alls ekki hætta í fimleikum hún hefði mikla náttúrulega hæfileika í fimleikum. Ekki slæmt að fá svona hrós :-)
Hér er myndband með keppninni.
Á þriðjudaginn var komið að stóru stund vetrarins hjá henni Kollu. Vorsýning Klassíska listdansskólans þar sem kolla er að æfa í þriðja flokki (þriðji veturinn hennar í forskólanum). Þetta var í fyrsta sinn sem hópnum hennar er treyst fyrir að vera einar á sviðinu þ.e. engin kennari með þeim og voru þær mjög stoltar af því.
Kolla stóð sig auðvitað mjög vel svo og hópurinn allur. Þetta eru reyndar alltaf alveg rosalega skemmtilegar sýningar hjá Klassíska listdansskólanum. Byrjar á verki þar sem blandað er saman eldri krökkunum sem eru virkilega hæfileikaríkir dansarar og búnir að æfa balett lengi og síðan litlu krökkunum sem eru að byrja. Eftir fyrsta hlé tekur svo við verk þar sem aðeins þeir sem lengra eru komnir sýna.
Hér er svo videó af Kollu sem ég tók á sýningunni. Þetta eru nú ekkert mjög góð myndgæði en besta sem hægt er að gera í svona sal (þ.e. fyrir utan upptökuna sem skólin gerir á alvöru kvikmyndavél). Ég byrjaði á að taka mynd af röngum enda sviðsins þar sem ég vissi ekki hvoru megin Kolla kæmi inn. En hún er svo nr tvö að koma inn á sviðið þegar ég sný myndavélinni til hægri í byrjun, svona til að koma augunum ykkar á réttan stað :-)
Jæja þá erum við búin að halda vantrúarhitting eftir allt of langt hlé á slíkum hádegishittingum.
Ég fór á fætur rétt rúmlega 8 og tók til og slakaði á og ryksugaði og skúraði. Kolla og Inga María tóku til í sínu herbergi og gengu frá dótinu sínu úr stofunni. Inga María tuðaði og tuðaði allan tíman. Henni fannst hún gera svo mikið meira en við hin. Samt var hún sú eina sem sat og tuðaði meðan við hin vorum að þrífa/taka til/elda!! Það er stundum doldið erfitt að vera hún. Alveg þar til hún fékk það verkefni að þrífa glerborðið inn í stofunni. Henni finnst gaman að pússa með rúðuúðanum svo hún gat dundað sér við það og hætt að tuða í bili.
Síðan kom fólkið og við nutum þess að spjalla saman og borða eggjaköku, pitsu og brauð sem Matti var búin að elda ofan í hópin. Alltaf gaman að hitta þennan skemmtilega hóp. Verst að borðstofuborðið er eiginlega hætt að rýma okkur. En samt finnst mér svo leiðinlegt að dreifa fólkinu um húsið sem við gætum samt alveg gert annað borðstofuborð inn í stofu. En hluti af hittingnum er að spjalla öll saman svo það er ekki eins ef komið í litla hópa út um allt.
Svona af því að ég er búin að læra að setja inn myndir í bloggið þá verð ég auðvitað að hafa myndir í hverri færslu er það ekki :-)
Svona liggja stelpurnar akkurat núna og horfa á teiknimynd, þreyttar eftir tiltekt morgunsins og spjallið við fólkið.
Þá eru það myndböndin :-)
Við tókum hjálpardekkin af hjólinu hennar Ingu Maríu 1. maí og síðan hefur hún eiginlega ekki stoppað að hjóla. Ég tók þetta myndband áðan svo þið gætuð séð hvað hún er orðin klár að hjóla.
Síðan setti ég líka inn myndband af Kollu að hjóla. Hennar hjálpardekk fóru nú af síðasta sumar en hún er líka voðalega duglegur hjólagarpur svo þið verðið að fá að sjá hana sína listir sínar líka :-)
Matti var að kenna mér að setja inn myndir á bloggið mitt á einfaldan hátt svo nú dæli ég myndum á þetta blogg :-)
Á sunnudaginn vorum við Matti rosalega dugleg að vinna í garðinum. Matti klippti trén og ég hreinsaði beð og tíndi upp greinar.
Eftir á fórum ég og mamma og stelpurnar upp í heiðmörk í göngutúr í góða veðrinu. Það verður nú að segjast eins og er að það var pínu kalt meira að segja snjóhaugar á köflum en var samt rosa góður göngutúr. Hér eru Áróra og Kolla í nestinu:
Hér er síðan mynd af Ingu Maríu og mömmu að borða nestið sitt.
